സമത്വം 

'പിടക്കോഴി  കൂവുന്ന'   നൂറ്റാണ്ടിലും 

പൂവ൯  കൂവി തന്നെ ഇരിക്കുന്നു 

പിടക്കോഴിക്ക്  കാലത്ത്  ഒരുപാട്‌  പണി ഉണ്ട് .

പത്രം  വായിക്കാ൯   കൊടുക്കാറില്ല 

പൂവന്  വായിക്കാ൯  അറിയില്ലെങ്കിലും 

പത്ത്  പിടകളെ  ഒപ്പം  വിടാറില്ല 

അവര്  കയറിയങ്ങ് ഭരിച്ചു കളഞ്ഞാലോ ???

എച്ചിൽ പാത്രം  മുതൽ  കിടക്ക  വരെ 

'നിവ൪ത്തിയ' പിട  കൂനിയിരുന്നു .

'' എനിക്കമ്മയാകാ൯  നീയും 

നിനക്കച്ചനാകാ൯  ഞാനും  എന്നിരിക്കെ 

നിന്റെ  കീശയിൽ  ഇരുന്ന്  'സമത്വം '

എന്നെ  പല്ലിളിച്ചു കട്ടുന്നതെന്തിന് ??''

കൊടി  പിടിച്ചും  കെട  പിടിച്ചും 

അടുക്കളക്കരി കൊണ്ട്  മീശ വരച്ചും 

കീശ  തുന്നിയ  ഷർട്ടിട്ടും ,

ബീഡിക്കുറ്റി  ഊതിവലിച്ച് 

കള്ളും മോന്തി  പിടിച്ചെടുത്താല്   

എന്റെ ' പെണ്ണത്തം ' രാത്രി  മഴയിൽ 

കരി  പുരണ്ട്  മീശ ഒലിച്ചു  വികൃതമാകും .

പത്രം വായിച്ചു  കൂട്ടം കൂടി

പണിയെടുത്ത്‌  ഞാ൯  നടക്കുമ്പോൾ 

ഇനി  കുനിയില്ലീ  ശിരസ്സ് 

തളരില്ലീ  മനസ്സ് 

നമുക്കിടയിൽ  'സമത്വമില്ല ........'

''എനിക്കമ്മയാകാ൯  നീയും 

നിനക്കച്ചനാകാ൯  ഞാനും  എന്നിരിക്കെ

ഒന്നാമനും  രണ്ടാമനും  ആകാതെ 

സമന്തരമായ്  നീങ്ങാം ..................

അഞ്ജന  വി